The Heron Ballads: No. 4
Wha will buy my Troggin,
fine Election Ware;
Broken trade o’ Broughton
A’ in high repair?
Buy braw Troggin,
Frae the Banks o’ Dee!
Wha want Troggin,
Let them come to me.
Here’s a noble Earl’s
Fame and high renown,
For an auld sang
It’s thought the Gudes were stown.
Here’s the worth o’ Broughton
In a needle’s e’e;
Here’s a reputation,
Tint by Balmaghie.
Here’s an Honest Conscience,
Might a Prince adorn,
Frae the Downs o’ Tinwald,
—So was never worn.
Here’s its Stuff and Lynin,
Cardoness’s Head,
Fine for a Soger,
A’ the wale o’ lead.
Here’s a little Wadset,
Buittle’s scrap o’ truth,
Pawn’d in a gin-shop,
Quenching holy drouth.
Here’s Armorial Bearings,
Frae the Manse o’ Urr;
The crest, an auld crab-apple,
Rotten at the core.
Here is Satan’s Picture,
Like a bizzard-gled,
Pouncing poor Redcastle,
Sprawlin as a tade.
Here’s the Font where Douglas
Stane and mortar names;
Lately used at Caily
Christening Murray’s crimes.
Here’s the Worth and Wisdom
Collieston can boast;
By a thievish Midge
they had been nearly lost.
Here is Murray’s Fragments
O’ the Ten Commands;
Gifted by Black Jock
To get them off his hands.
Saw ye e’er sic Troggin?
If to buy ye’re slack,
Hornie’s turning Chapman,
He’ll buy a’ the Pack!
Buy braw Troggin,
Frae the Banks o’ Dee!
Wha want Troggin,
Let them come to me.
